កំពង់ចាម៖ រដ្ឋបាលខេត្តកំពង់ចាម នឹងរៀបចំកម្មវិធីរួមអបអរសាទរពិធីបុណ្យចេញព្រះវស្សារយៈពេល២ថ្ងៃចាប់ពីថ្ងៃទី២៨-២៩ ខែតុលា ឆ្នាំ២០២៣។

ក្នុងឱកាសអបអរសាទរពិធីបុណ្យចេញព្រះវស្សា រដ្ឋបាលខេត្តកំពង់ចាមនឹងរៀបចំពិធីប្រណាំងទូក មានរយៈពេលពីរថ្ងៃ នៅថ្ងៃទី២៨-២៩ ខែតុលា ឆ្នាំ២០២៣ ចាប់ពីម៉ោង ១២ថ្ងៃត្រង់នៅវេទិកាអុំទូក ភូមិជ្រោយថ្ម សង្កាត់បឹងកុក ក្រុងកំពង់ចាម ជាមួយនឹងការតាំងពិព័រណ៍សមិទ្ធផលរដ្ឋបាលក្រុង-ស្រុក មន្ទីរអង្គភាពជុំវិញខេត្ត និងផលិតផលនានាក្នុងខេត្តកំពង់ចាម។

នៅពេលយប់ ក៏នឹងមានការប្រគុំតន្រ្តី នៅមាត់ទន្លេ ក្រុងកំពង់ចាម និងមានពិធីបណ្តែតប្រទីប និងអុចកាំជ្រួច នៅរាត្រីថ្ងៃទី២៩ ខែតុលា ឆ្នាំ២០២៣ ចាប់ពីម៉ោង ១៨ៈ៣០នាទីនៅកំពុងរង់ចាំ។

រដ្ឋបាលខេត្តរៀបចំពិធីនេះឡើងដើម្បីចូលរួមអបអរសាទរពិធីបុណ្យចេញព្រះវស្សា និងលើកស្ទួយវប្បធម៌ប្រពៃណី ជាពិសេសចង់បង្កបរិយាកាសសប្បាយរីករាយជូនប្រជាពលរដ្ឋ។

រដ្ឋបាលខេត្តអំពាវនាវដល់ពលរដ្ឋអញ្ជើញចូលរួមទស្សនាឱ្យបានច្រើនកុះករ ដើម្បីរួមចំណែកលើកទឹកចិត្ត គាំទ្រដល់វិស័យកីឡាប្រណាំងទូកក្នុងខេត្តកំពង់ចាម។

គូសបញ្ជាក់ថា ពិធីចូលព្រះវស្សាមានរយៈពេល ៣ខែ រាប់ពីថ្ងៃ ១រោចខែអាសាធដល់ ១៥កើតខែអស្សុជ ដោយឆ្នាំនេះថ្ងៃចូលព្រះវស្សាគឺត្រូវនឹងថ្ងៃទី០២ ខែសីហា រហូតដល់ថ្ងៃទី២៩ ខែតុលា។ ចាប់តាំងពីថ្ងៃពេញបរមីខែអាសាធគឺមុនថ្ងៃចូលព្រះវស្សា ១ថ្ងៃ គេសង្គេតឃើញភាពអ៊ូអរស្ទើរតែគ្រប់វត្តអារាម៕